LA LUNA TURCA ( M. Lo Cascio)

Sta luna turca ammenzu di lu mari,
idda ndi faci sempri ‘nnamurari,
idda ndi futti, cu la so bellizza
fa cririri ca a vita è comu na carizza,
ma na carizza dura un hiuhiu i ventu
e a vita ‘mbeci tuttu u so turmentu.
Ca na carizza ti faci suspirari
na vota sula pi lu so piaciri,
a vita è un ghiornu bonu e un ghiornu malu
ma a notti è a luna chi cumanda u giru,
ca na carizza dura quantu po durari
e certi voti vali tuttu u tempu du campari.
Mancu sti nuvuluni niri di tempesta
ponnu oscurari lu lluciri i chista,
ca se si ffaccia, a luna, o se si mbuccia
lu mari di cca ssutta nci specchia a lucintizza.
Tempesta di la vita chi non vo mai finiri,
fammi na carizza comu a luna supra u mari.